Действия с Документом
Сож № 1, люты
|
Акцыя ў Гомелі: трое ўдзельнікаў аштрафаваныя
"КДБ нас гоніць – Канстытуцыя бароніць" – пад такім лозунгам учора ў Гомелі прайшла акцыя пратэсту. Некалькі маладых людзей разгарнулі каля абласнога драматычнага тэатру шасціметровы транспарант-расцяжку з тэкстам: "КДБ нас гоніць – Канстытуцыя бароніць". З гэтым транспарантам яны прайшлі праз цэнтральную плошчу горада ад тэатра да Гомельскага абласнога выканаўчага камітэту. Там адбылося 30-хвіліннае пікетаванне, пасля чаго міліцыя затрымала Андрэя Цянюту і Васіля Токаранку. Яны дастаўлены ў аддзел унутраных спраў Цэнтральнага раёна Гомеля. Праз нейкі час у РАУС прывезлі таксама Канстанціна Жукоўскага – ён здымаў тое, што адбывалася, на відэакамеру. Па словах удзельнікаў, такім чынам яны выказалі пратэст супраць звальнення з працы актывістаў дэмакратычнага руху. Нядаўна з працы быў звольнены адзін з іх – Кастусь Жукоўскі. На меркаванне ўдзельнікаў акцыі, звальненні адбываюцца па палітычных матывах – з-за актыўнай жыццёвай пазіцыі гэтых людзей. Акцыя, як паведамілі яе ўдзельнікі, праведзена сябрамі міжнароднай грамадскай арганізацыі "Малады фронт" і арганізацыйнага камітэта партыі "Беларуская хрысціянская дэмакратыя". На ўсіх затрыманых супрацоўнікі РАУС складаюць пратаколы па артыкуле 23.34 Адміністрацыйнага кодэкса Рэспублікі Беларусь – "удзел у несанкцыянаваным масавым мерапрыемстве". Адразу пасля гэтага суд Цэнтральнага раёна Гомеля аштрафаваў А.Цянюту на 2 мільёны 800 тысяч рублёў, В.Токаранку на 1 мільён 750 тысяч рублёў, на К.Жукоўскага накладзены штраф у 3 мільёны 500 тысяч. Тэльман Маслюкоў, regionby.org 04.02.2009 |