Действия с Документом
Студэнтам ня дужа падабаецца беларуская сыстэма адукацыі
З кожным годам мы губляем таленавітых маладых людзей, якім цяжка навучацца па савецкай праграме. Шмат моладзі, якая мае грошы і думае крэатыўна з'язджае за мяжу.
Чаму беларускія студэнты не вельмі задаволены адукацыяй на сваёй Радзіме? Адмыслоўцы звязваюць гэта з шэрагам прычын.
Па-першае, выкладанне прадметаў па спецыяльнасці і агульнаадукацыйных вядзецца на адным узроўні. Прычым кожны выкладчык лічыць свой прадмет самым важным, і студэнт павінен дасканала разбірацца ў дысцыплінах, якія яму не вельмі патрэбны. Па-другое, моладзь не разумее, навошта трэба перапісваць падручнік у сшытак на лекцыях. Па-трэцяе, чаму ў беларускіх студэнтаў няма бясплатнага выхаду на адукацыйныя рэсурсы ў інтэрнэце, як у цывілізаваных краінах? Пытанняў шмат...
Ну а што думаюць наконт айчыннай сістэмы вышэйшай адукацыі самі маладыя?
Алена, студэнтка 4-га курса БДУ:
– Я не зусім задаволена сістэмай адукацыі. Мне заўсёды не падабалася, што студэнты і выкладчыкі мала размаўляюць наконт сучасных праблем. Каб добра зразумець якую-небудзь тэму, можна проста прывесці сапраўдны жыццёвы прыклад, чым звяртацца да падручнікаў мінулага стагоддзя.
Уладзімір, студэнт 3-га курса БНТУ:
– Насамрэч, мне падабаецца сістэма вышэйшай адукацыі ў нашай краіне. Мне здаецца, што мы здолеем прынесці карысць для нашай дзяржавы, але тут адразу паўстае крышку іншае пытанне – як пасля атрымання адукацыі ўладкавацца на працу. Зараз любая арганізацыя жадае бачыць творчага, энергічнага, разумнага супрацоўніка, які мае вопыт працы, а дзе яго ўзяць выпускнікам ВНУ? Вось менавіта галоўная праблема, з якой сутыкаюцца студэнты старэйшых курсаў.
Антон, студэнт 5 курса БДУІР:
– Безумоўна, наша сістэма яшчэ адстае ад еўрапейскай. Гэта тычыцца выкарыстання новых тэхналогій у сферы адукацыі. У мяне як у будучага праграміста ёсць шмат ідэй, якія маглі б зрабіць лекцыі больш цікавымі, а семінары больш плённымі, але, на жаль, у краіне праблемы з фінансамі, і кіраўніцтва зацікаўлена ў развіцці аграгарадкоў, а не адукацыі.
Вольга, студэнтка 1-га курса БДЭУ:
– Калі я паступала в універ, то думала, што буду навучацца, як паказваюць у амерыканскіх фільмах, але ўсё атрымалася не так... На лекцыях толькі пішы, на практычных занятках рабі задачы...Усё вельмі сумна.
Такім чынам. праблемы сапраўды ёсьць, і іх трэба вырашаць як мага хутчэй, каб наступнае пакаленне з гонарам гаварыла : "Я студэнт беларускага універсітэта!"