Действия с Документом
Падрыхтоўка да "Дажынак-2008" стала стыхійным бедзтвам
У Воршы не пасьпяваюць засвойваць грашовыя сродкі, выдаткаваныя на падрыхтоўку да восеньскага сельскагаспадарчага рэспубліканскага форуму.
Аршанскія старажылы апошнім часам найчасьцей як звычайна згадваюць Воршу часоў мінулае вайны: цэнтар горада нагадвае руіны, нібыта пасьля налёту варожых бамбардзіроўшчыкаў. На цэнтральных вуліцах узрыты асфальт, і толькі дзе-нідзе ўжо кладзецца новая тратуарная плітка. Будынкі стаяць бяз вокнаў, пакуль да іх дойдзе чарга на ўстаноўку плястыкавых шыбаў.
Што ўжо казаць пра тое, што ў горадзе не працуе амаль ніводная ўстанова грамадзкага харчаваньня – у сталоўках, рэстарацыях ды кавярнях праводзяцца капітальныя рамонты, каб увосень уразіць усіх гасьцей сёлетніх дажынак. А яшчэ карэнныя аршанцы блытаюцца, ня ведаючы маршрутаў руху грамадзкага аўтатранспарту – яны мяняюцца ці не штотыдзень, бо праводзіцца рэканструкцыя праежджай часткі некаторых вуліц і праспэктаў…
Выдаткі на падрыхтоўку Воршы да "Дажынак" самыя грандыёзныя за апошнія гады ў параўнаньні зь іншымі "сталіцамі" сьвяткаваньняў. Так, у Рэчыцы было засвоена 176 мільярдаў рублёў, у Бабруйску – 200 мільярдаў, а ў Воршы – мусяць скарыстаць ажно 327 мільярдаў рублёў бюджэтных грошай.
Паводле словаў намесьніка старшыні Віцебскага аблвыканкаму Віктара Пятрушы, да "Дажынак" адбудоўваюцца і рэстаўруюцца 692 аб’екты. Меркавалася, што ўсе работы маюць быць завершанымі да 1 жніўня, але пакуль засвоена толькі 100 мільярдаў рублёў – гэта значыць, зроблена ня больш за 50 адсоткаў ад заплянаванага.
На некаторых аб’ектах будаўнічыя працы адбываюцца паралельна з праектаваньнем – зацьверджаныя праектна-сьметнай дакумэнтацыяй лічбы літаральна тут жа увасабляюцца ў жыцьцё, і такая "паскораная" тэхналёгія небеспадстаўна выклікае ў аршанцаў сумневы ў якасьці. Яны распавядаюць, што ў новым аўтавакзале літаральна пасьля першага дажджу пачаў працякаць дах, і выказваюць меркаваньні, што нешта падобнае чакае і сярэднія школы №№ 1,2,4,7,8 і 9, дзе рамонт дахаў і ўстаноўку плястыкавых шыбаў праводзілі з сакавіка ў самае неспрыяльнае надвор’е, парушаючы тэхналягічныя нормы.
Зрэшты, будаўнікі нічым не рызыкуюць: бальшыня зь іх – прыежджыя майстры зь Віцебску, Менску, Полацку ды іншых гарадоў. Так што зьвярнуцца да іх з прэтэнзіямі шараговым грамадзянам будзе нялёгка. А што да аршанскага начальства, дык яго трывожыць хіба тое, каб пасьпець зрабіць хаця б асноўнае – дробязі, як жартуюць аршанцы, будуць ліквідаваць ужо ў апошнюю ноч перад "Дажынкамі".
Нядаўна да клопатаў з рамонтамі і рэканструкцыяй для аршанскіх уладаў дадалася яшчэ адна праблема: "уверсе" вырашылі, што да "Дажынак" гораду неабходна займець адмысловы сымбаль – нешта накшталт скульптурнай выявы бабра, усталяванай у Бабруйску. У Воршы вырашылі паставіць помнік чыгуначніку – бо тут месьціцца найбуйнейшы ў Беларусі чыгуначны вузел. Жыхары горада толькі пасьмейваюцца над гэтай ідэяй: на чыгуначным вакзале ўжо ўсталяваны помнік Канстанціну Заслонаву – партызанскаму кіраўніку, вядомаму зь гісторыі тым, што ён удала падрываў чыгуначныя рэйкі. Ня менш абсурднай для іх выглядае прапанова ўручаць сувэнірныя фігуркі чыгуначнікаў рэкардсмэнам у сельскай гаспадарцы.
Алена Штраль
24.06.2008