Действия с Документом
Абвінавачанне трафарэтнае: брыдкасловіў
На сем сутак пазбаўлення волі асуджаны лідэр Магілёўскай суполкі "Малады Фронт" Максім Азараў.
"Дробнае хуліганства" – такі прысуд вынес суддзя Кастрычніцкага раёна Магілёва Раман Касцюк.
– Учора вечарам мы павінны былі сустрэцца з Максімам, – узгадвае маладзёжная актывістка Тацяна Буланава. – У 21.30 на прыпынку "Універмаг Кастрычніцкі". Калі я падышла на месца сустрэчы, то яго там не застала.
Тацяна пачала тэлефанаваць. Спачатку слухаўку ніхто не браў, а потым абанент стаў недаступным.
– Я тэлефанавала яму раз дзесяць, – гаворыць Тацяна, – але безвынікова. Мы перапужаліся, што з ім здарылася благое і абтэлефанавалі ўсе бліжэйшыя апорныя пункты, у тым ліку Кастрычніцкі РАУС, але бясплённа. Нарэшце бацькі паведамілі: Максіма толькі што затрымалі за дробнае хуліганства.
Са слоў сведкаў, якія знаходзіліся ў судзе, Максім нібыта крычаў і брыдкасловіў.
Тацяна Буланава:
– Тыя людзі супярэчылі адзін аднаму. На маю думку, прысуд быў вынесены даўно і ў залі яго толькі зачыталі з паперкі.
Вітольд Няўрыда
23.03.2007