Belnarod.org – Сайт региональных новостей от гражданских и профсоюзных активистов, журналистов и просто небезразличных людей

Група пачала дзейнічаць з 1 верасня 2007 года па ініцыятыве бацькоў, якія пажадалі каб іхнія дзеці выхоўваліся ў атачэнні беларушчыны.

Са словаў Зьміцера Салаўёва, аднаго з ініцыятараў стварэння беларускамоўнай групы на базе дзіцячага садка №81, група разлічана на дзяцей узростам ад 3 да 5 год і зараз у групе знаходзіцца пакуль толькі чатыры чалавекі.

Садок месціцца па адрасу: Дняпроўскі бульвар, 58А, за абутковай крамай "Бадэн", па маршруту аўтобуса №11.

– Для таго каб аддаць сваіх дзяцей у гэтую групу, – распавядае Зміцер, – неабходна падаць заяўку ў Ленінская РАНА. Аплата за дзіцячы садок стандартная – 29 000 рублёў на месяц.

– У Магілёве зараз назіраецца бэбі-бум, – гаворыць рэдактар газеты "НАШ Магілёў" Андрэй Воўкаў, – У мінулым годзе ў Магілёве нарадзіўся 370-тысячны жыхар і горад упершыню за апошнія гады выйшаў на перавышэнне нараджальнасці над смертнасцю. У сувязі з гэтым ў горадзе не хапае дзіцячых садкоў. Як толькі нараджаецца дзіця, бацькі на працягу тыдня становяцца ў чаргу на атрыманне месца ў садку. Утвораная беларускамоўная група – гэта шанец без перашкодаў атрымаць месца ў групе. Тым больш што дзеці будуць надзелены большай увагай выхавальнікаў у сувязі з тым што група пакуль не шматлікая.

Больш падрабязную інфармацыю аб беларускамоўнай групе можна атрымаць па тэлефону: +375 29 691 59 63 (Зміцер Салаўёў).

Вітольд Няўрыда

31.01.2008

Пасля 10 сутак адміністратыўнага арышту за арганізацыю і правядзенне мітынгу прадпрымальнікаў у Магілёве 10 студзеня 2008 года на волю выйшаў актывіст “Рушэння” Валадар Цурпанаў.

Cустрэць актывіста прыйшлі лідэры магілёўскіх дэмакратычных арганізацыяў і партыяў.

Перад будынкам ізалятара часовага ўтрымання быў выстаўлены супрацоўнік міліцыі, які не падпускаў да дзвярэй ізалятара актывістаў дэмакратычнага руху, у выніку чаго яны былі вымушаны пэўны час знаходзіцца на адлегласці пяцідзесяці крокаў ад забора. Перад ізалятарам стаяў “Уазік”, унутры якога знаходзіліся супрацоўнікі атраду спецыяльнага прызначэння. Адзін з пасажыраў “Уазіка” нахабна вёў відэазапіс сабраўшыхся.

Трэба адзначыць што ні адзін прадпрымальнік не прыйшоў сустракаць чалавека, які адстойваў іх правы на плошчы Леніна 10 студзеня. Да прыняцця сумнавядомага прэзідэнцкага ўказа №760 Валадар Цурпанаў працаваў шаўцом у прыватнага прадпрымальніка. Пасля яго прыняцця ён застаўся беспрацоўным.

10 студзеня 2008 года ў Магілёве адбыўся мітынг прадпрымальнікаў, у якім ўзяла ўдзел каля 500 чалавек. У той дзень Валадар утварыў вакол сябе кола з прысутных і выступаў на працягу ўсяго мітынгу, заклікая ўлады да адмены ўказу. 15 студзеня ён явіўся ў Ленінскі РАЎС па позве, адкуль быў дастаўлены ў суд Ленінскага раёна горада Магілёва, які праз дзень вынес яму вырак у выглядзі 10 сутак пазбаўлення волі за арганізацыю і правядзенне несанкцыянаванага мітынгу прадпрымальнікаў.

Вітольд Няўрыда

25.01.2008

Рабочы аступіўся і зваліўся на ляжачыя ўнізе бетонныя пліты з вышыні трэцяга паверха. Смерць наступіла імгенна.

Інцыдэнт адбыўся 21 студзеня каля 14-00, на будоўлі шматпавярховага дома ў раёне 30-год Перамогі. Не гледзячы на трагічнае здарэнне будаўнічыя работы не прыпынены.

Са словаў аднаго з майстраў, гэта быў 55-гадовы рабочы-будаўнік Мікалай Яўмент. У яго засталася жонка і дзеці. На месца здарэння зараз чакаюць следчую групу.

Трэба адзначыць, што будаўнічыя работы выконвае будаўнічы трэст №12, які вылучаецца дрэннымі ўмовамі працы і пастаянным парушэннем  тэхнікі бяспекі.

Вітольд Няўрыда

21.01.2008

Па нейкай "выпадковасці" на позвах стаіць дата 21 студзеня, якая супадае  з запланаванай акцыяй пратэсту прадпрымальнікаў у Менску на Кастрычніцкай плошчы.

Як стала вядома карэспандэнту Bulletinonline.org  такія позвы ўжо атрымалі актывісты дэмакратычнага руху Тацяна Буланава, Яўген Бойка, Алесь Паплыка; незалежныя журналісты – Ігар Барысаў, Алесь Буракоў, Ганна Ільіна. Была спроба ўручыць падобную паперу юрысту Свабоднага прафсаюзу Беларускага Сяргею Фаміну, але яго жонка не адчыніла дзверы незнаёмым людзям.

Толькі ў позве Тацяны Буланавай пазначана, што яе запрашаюць ў Ленінскі РАЎС у якасці сведкі па нейкай крымінальнай справе. На ўсіх астатніх позвах статус запрашаемых у міліцыю людзей ніяк не абазначаны.

– За мной ужо даўно ідзе пільны кантроль, – адзначае Алесь Паплыка, сябра творчай групы "НАШ Магілёў". – Як толькі я вярнуўся з Польшчы дамоў, дзе адзін год вучыўся па праграме імя Кастуся Каліноўскага, то да мяне адразу завітаў участковы. Ён цікавіўся маімі планамі на будучыню і чым я зараз займаюся. Учора я атрымаў позву і чамусьці я гэтым не здзіўлены. Улада спрабуе нейтралізаваць найбольш актыўных людзей, да якіх я сябе залічваю. Я быў адным з удзельнікам намётавага мястэчку ў 2006 года пасля прэзідэнцкіх выбараў, за што і атрымаў 10 сутак. Думаю з-за гэтага ў міліцыянтаў да мяне такі інтарэс.

Праваабаронца Барыс Бухель мяркуе, што такім чынам мясцовая ўлада падстрахоўваецца, каб не атрымалася чарговага стыхійнага мітынгу прадпрымальнікаў у Магілёве, як гэта адбылося 10 студзеня на плошчы Леніна, калі ў акцыі пратэсту прыняла ўдзел каля 500 чалавек.

– Я бачу ў гэтым спробу нейтралізаваць актывістаў перад мітынгам прадпрымальнікаў 21 студзеня, – гаворыць журналіст Ігар Барысаў, – каб найбольш актыўныя магілёўцы не даехалі да яго месца правядзення ў Менску. Толькі не магу зразумець, чаму сярод тых, хто атрымаў позвы, тры незалежных журналіста!

Але не ўсе з тых, хто атрымаў позвы, здолеюць прыйсці ў пазначаны дзень і час. Алесь Буракоў знаходзіцца за межамі Беларусі, а Тацяна Буланава моцна хварэе.

Нагадаем, што пасля акцый пратэсту прадпрымальнікаў у Менску, Магілёве, Бабруйску было затрымана больш за 40 удзельнікаў такіх мерапрыемстваў, якія атрымалі тэрміны зняволення ад 10 да 20 сутак. У Магілёве за арганізацыю і правядзенне мітынгу прадпрымальнікаў 10 сутак атрымаў актывіст "Рушэння" Валадар Цурпанаў

21.01.2008

У Магілёве створаны аргкамітэт па сьвяткаваньні 431-гадавіны зь дня атрыманьня горадам Магдэбурскага права.

– Сьвяткаваньне гэтай даты, – адзначае сябра аргкамітэту Алесь Сілкоў, – у Магілёве сталася добрай традыцыяй. Пачынаючы з 1997 года мы, актывісты дэмакратычных арганізацыяў і партыяў, праводзім розныя мерапрыемствы і такім чынам спрабуем прыцягнуць увагу магілёўцаў да гэтай гістарычнай даты. Сёлета плянуецца зрабіць буклеты і сьпецвыпуск газэты "НАШ Магілёў", якія будуць прысьвечаныя тэматыцы мясцовага самакіраваньня.

– Акрамя гэтага, – адзначае Алесь Сілкоў, –- падрыхтаваны ліст на імя мэра Віктара Шорыкава з просьбай дазволіць правядзеньне канфэрэнцыі прысьвечанай Магдэбурскаму праву ў памяшканьні аднаго з музэяў гораду.

Таксама плянуецца правесьці конкурс сачыненьняў і малюнкаў сярод вучняў сярэдніх школаў па вышэйузгаданай тэматыцы.

Адзін з актывістаў аргкамітэту выказаўся за правядзеньне суботніку па добраўпарадкваньню тэрыторыі, дзе зараз адбываецца адбудова магілёўскай Ратушы. Прапанова падтрыманая і ў бліжэйшы час актывісты ўзгадняць гэтае пытаньне зь мясцовымі ўладамі.

Нагадаем, свой першы герб і Магдэбурскае права Магілёў атрымаў 28 студзеня 1577 году. 9 чэрвеня 1661 году ў выніку паўстаньня супраць маскоўскага войску, падчас якога забілі каля 7 000 маскоўскіх стральцоў, горад быў ураўнаваны ў правах са сталіцай Вялікага Княства Літоўскага Вільняй і атрымаў свой чарговы герб: "у блякітным полі тры срэбныя вежы; у адчыненай браме сярэдняй – рыцар узброены мячом; зьверху над брамай на круглым чырвоным шчыце – вершнік …", які пазьней у 1781 годзе, па ўказу Сэнату, быў прадстаўлены элемэнтам дзяржаўнага гэрба "Пагоня".

Вітольд Няўрыда

11.01.2008