Действия с Документом
Мясцовыя саветы ачысцілі ад іншадумцаў
У Магілёўскай вобласці абрана больш за 3200 дэпутатаў. Але з вылучэнцаў палітычных партый у дэпутацкім корпусе толькі некалькі сябраў праўладнай КПБ.
Выбары, як вядома, былі безальтэрнатыўныя, а кіраўнікі вобласці заклікалі выбаршчыкаў галасаваць за "дастойных кандыдатаў". Кандыдаты, падтрыманыя ўладамі, меліся ў кожнай акрузе. Але не ўсюды яны знайшлі падтрымку людзей. У Магілёўскай вобласці ёсць выпадкі (адзінкавыя – каментуюць у выбаркаме), калі ў некаторых акругах выбары адбыліся, але дэпутаты ў сельскі савет не абраны.
Праўда, гэта ніяк не паўплывае на легітымнасць такіх сельсаветаў: усе яны маюць пераважную большасць новаабраных дэпутатаў. Ці будуць у акругах, дзе не абраны дэпутаты, прызначаны новыя выбары, пакуль невядома. Гэта пытанне вырашаць кіраўнікі новых саветаў пасля першых арганізацыйных сесій, якія пройдуць цягам месяца.
Склад мясцовых саветаў дэпутатаў у Магілёўскай вобласці ў выніку выбараў абноўлены больш як напалову. На выбарах, паводле афіцыйнай інфармацыі аблвыбаркама, прагаласавала 83,3 адсоткаў выбаршчыкаў.
Сяргей Гутарэвіч
17.01.2007