Действия с Документом
Кінатэатр ператварылі ў праваслаўны храм
У Магілёве адкрылася новая, чацвёртая ў горадзе і 78 у вобласці царква. Праваслаўе – дамінуючая канфесія ў рэгіёне.
Раней у цяперашнім культавым будынку мясціўся кінатэатр "Змена". За год праваслаўныя вернікі зрабілі рамонт. На яго пайшлі ахвяраванні прыхаджанаў, свой унёсак зрабілі нават бабруйскія казакі.
Новы храм у гонар сьвятога цудатворцы Серафіма Сароўскага асвяціў Мітрапаліт Філарэт, які прамовіў людзям, што з’яўленне цэркваў мае вялікае значэнне для духоўнага адраджэння народа – чым больш будуецца іх, тым больш набожнымі і маральна здаровымі будуць людзі.
Гэта царква у Магілёве – ужо чацвёртая з дзеючых. Цяпер паступова расце Свята-Прэабражэнская ў мікрараёне "Задняпроўе". Святары прыдняпроўскай сталіцы замахнуліся пабудаваць самы вялікі праваслаўны храм у Беларусі, але грошай не стае і работы ідуць квола. А вернікі з Задняпроўя звыкла наведваюць чыгуначны вагон, перароблены ў часовую цэркву.
Сёлета летам абяцаюць пачаць будаўніцтва новага культавага будынка ў цэнтры Магілёва, у парку імя Горкага. Ён стане помнікам пакутнікам і воінам, што аддалі жыццё за Айчыну ў ХХ стагоддзі.
У гэтага праекта нямала прыхільнікаў, але і праціўнікаў. Справа ў тым, што ўлады дазволілі праваслаўным пабудаваць новы храм на Замчышчы – гістарычным цэнтры Магілёва, вядомым таксама як "Магіла ільва".
Гэта месца яшчэ да канца не даследавана, і там кожны метр зямлі абяцае адкрыцці. Гісторыкі прапануюць там пабудаваць археалагічны музей пад адкрытым небам. На Замчышчы ў ХІІ стагоддзі стаяла драўляная царква, і можна паводле рэштаў яе фундамента зрабіць рэканструкцыю, каб атрымаўся выдатны аб’ект гарадскога турызма.
А ўсяго ў Магілёўскай вобласці цяпер будуецца яшчэ 23 новых праваслаўных храмы. У дадатак да тых 78, якія дзейнічаюць. Праваслаўная царква мае 103 прыходы і дамінуе ў рэгіёне.
Сяргей Гутарэвіч
18.01.2007