Действия с Документом
Праваслаўныя Магілёва пайшлі хросным ходам
Ён налажаны ў гонар Свяціцеля Георгія Каніскага – архіепіскапа, які жыў у Магілёве у 18-м стагоддзі і вёў актыўную барацьбу за праваслаўную веру.
Беларуская праваслаўная царква ў 1993 годзе прылічыла Каніскага да ліку святых.
Сёлета ў хросным ходзе бралі ўдзел каля тысячы праваслаўных вернікаў. У фінале да іх далучыліся Мітрапаліт Філарэт, а таксама і прадстаўнікі свецкай улады – кіраўнікі Магілёва і вобласці.
Завершылася ўсё малебнам каля Архірэйскага палаца – помніка архітэктуры 18-га стагоддзя, дзе калісьці была рэзідэнцыя Георгія Каніскага. Каменны палац цудам захаваўся ў войнах і рэвалюцыях. За савецкім часам у ім быў жылы дом без зручнасцяў, а потым яго планавалі адрэстаўраваць і перадаць музею гісторыі Магілёва. Тым не менш, улады некалькі гадоў таму аддалі палац праваслаўнай епархіі.
Рамонт, які новыя гаспадары зрабілі ў помніку архітэктуры, абурыў гісторыкаў, журналістаў і магілёўскую грамадскасць. Яны разбурылі мармурную лесвіцу, па якой, дарэчы, і хадзіў сам Свяціцель Георгій. Затое там з’явіўся гараж, шклопакеты і сучаснае еўрааздабленне. "Што гэта за рэстаўрацыя?" – пыталіся магілёўцы, але ўлады не захацелі пачуць пратэсты.
Праўда, епархія мае свой погляд на справу: яе кіраўніцтва лічыць, што праваслаўныя выратавалі будынак ад разбурэння. Аднак і практычна зачынілі яго для публікі: толькі цяпер у палацы адчыніўся невялікі метадычны пакой для настаўнікаў, дзе можна пакарыстацца матэрыяламі ў дапамогу духоўнага і маральнага выхавання дзяцей. Напрыклад, пра шкоду палення альбо пра небяспеку абортаў.
Хросны ход у гонар Каніскага – сёлета ўжо трэці. Праваслаўныя вернікі Магілёўшчыны ўжо ўшанавалі такім чынам знакамітыя на ўсю Беларусь цудатворныя абразы Бялыніцкай Божай маці і Баркалабаўскай Божай маці.
Сяргей Гутарэвіч
07.08.2007