Действия с Документом
Манах-дамініканец напісаў кнігу пра Беларусь
І прадставіў яе чытачам у Берасьці. Твор называецца "Паўстаньне Беларусі". Аўтара завуць Пётр Рудкоўскі.
Рудкоўскі малады яшчэ чалавек сьціплага целаскладу, з прыемнымі рысамі твару, русявай бародкай і акулярамі, празь якія пазіраюць на сьвет бясспрэчна разумныя вочы. Манера трымацца сьціплая да сарамлівасьці. Але можа быць цьвёрдым і нават хірургічна цьвёрдым. Гэта адчуваеш, калі ён абгрунтоўвае сваю пазыцыю ў размове. Яшчэ лепш прачытаць адзін зь ягоных палемічных артыкулаў.
Ён апрануты ў белую манаскую рызу. На цяпер Пётр Рудкоўскі каталіцкі дзьякан. А яшчэ ён выкладчык – чытае курс лёгікі і філязофіі для студэнтаў Эўрапейскага гуманітарнага ўнівэрсітэту ў Вільні.
Рудкоўскі не баяўся ўвязвацца ў бойку, яшчэ калі сам быў студэнтам. У часопісе "Архэ" колькі гадоў таму напісаў пра апалячваньне і антыбеларускую пазыцыю касьцёлу на Гарадзеншчыне. Як мы бачым, гэта не прывяло да злому ягонай кар’еры ў касьцёле. А ў галіне пісьменьніцкай плёнам інтэлекту стала кніжка на 250 старонак.
На прэзэнтацыі " Паўстаньне Беларусі" ў Берасьці было колькі дзясяткаў цікаўных. Паколькі кніга выйшла ў бібліятэчцы "Нашай Нівы", то ўступнае слова трымаў рэдактар газэты Андрэй Скурко.
Відавочна, што з часоў палемікі ў "Архэ" пагляд аўтара забраў больш углыб і ўшыркі. Як філёзаф ён аналізуе шматканфэсыйнасьць Беларусі і беларушчыну, супадзеньне нацыянальнага нігілізму і нацыяналізму як крайнасьцяў, небясьпекі і станоўчы патэнцыял розных варыянтаў разьвіцьця краіны. Вянчаюць твор тры пропаведзі "За Беларусь" брата Рудкоўскага.
Мяркуючы па тым, як разыходзіцца кніга, неўзабаве будуць, дзе да месца, водгукі на яе. Прывезеныя ў Берасьце томікі разышліся ўжо на першай сустрэчы, а позна ўвечары была і яшчэ адна. Там пісалі сьпісы жадаючых набыць твор.
Пятро Васілеўскі
26.01.2008