Действия с Документом
Прынямоньне № 4, красавік
|
Гісторыкаў падзялілі на "чэсных" і "нячэсных"
У Горадні двум дактарам навук забаранілі ўдзельнічаць у канфэрэнцыі да 880-годзьдзя гораду. Некаторыя калегі заявілі аб сваёй салідарнасьці зь імі. Дактары гістарычных навук Алесь Краўцэвіч і Алесь Смалянчук спачатку ўбачылі ў праграме юбілейнай канфэрэнцыі, што адбудзецца 10-11 красавіка, тэмы сваіх дакладаў, а затым атрымалі паведамленьне: удзельнічаць яны ня будуць. Мы папрасілі абодвух гісторыкаў пракамэнтаваць гэтую забарону. – Асаблівых эмоцый адмова ня будзіць, таму што немагчыма казаць пра тое, што канфэрэнцыя менавіта навуковая, – кажа Алесь Краўцэвіч. – Яна – проста адно з шэрагу мерапрыемстваў, якія ўлада ладзіць у рамках сьвяткаваньня юбілею Горадні. Адзінае, я хацеў выкарыстаць трыбуну, каб яшчэ раз пагаварыць пра тое, як фармаваўся гістарычны горад на працягу некалькіх стагодзьдзяў. Як на працягу царскага, камуністычныга і лукашэнкаўскага яго бураць. Тэма дакладу –гісторыя горадабудаўнічага разьвіцьця Горадні. Канешне, сказаў бы і пра апошні этап, калі гістарычная забудова руйнуецца неадукаванымі людзьмі. Яны гэта робяць не спэцыяльна, а менавіта праз сваю неадукаванасьць. Чыноўнікі пабаяліся выслухаць праўду. Па-другое, гэта ў пэўным сэнсе помста за тое, што мы з Алесем Смаленчуком актыўна ўдзельнічалі ў кампаніі ратаваньня Горадні: пісалі заяву на імя генэральнага пракурора аб парушэньні культурнага слою, і была рэакцыя зь Менску. Ну, і яшчэ гэта помста людзей лакейскага складу людзям свабодным – ня хочуць нас бачыць у сваім коле. Мы гаворым што думаем, мы не баімся вольнай думкі. Мы любім сваю краіну… Што да рэакцыі калегаў: некаторыя адкрыта адмовіліся ўдзельнічаць у канфэрэнцыі за дыскрымінацыю і зьневажаньне ідэалаў навукі, іншыя зрабілі гэта паціху – яны проста не прыедуць чытаньні. Смалянчук: – Я думаю, зараз улады будуць імкнуцца так, каб усе ўдзельнікі канфэрэнцыі, апроч нас, прачыталі свае даклады. Але я ведаю, што чалавек, хіба, пятнаццаць, у тым ліку зь іншых гарадоў Беларусі, не прыедуць, не далучацца да канфэрэнцыі якраз таму, што яны выказваюцца ў нашую падтрымку, толькі прасілі не называць іхнія імёны. Алесь Кавалёў 10.04.2008 |