Действия с Документом
Прыгажосьць запатрабавала ахвяраў
Ідэя ДАІ падчас "Славянскага базару" выставіць на цэнтральных скрыжаваньнях дзяўчат-рэгуліроўшчыц выклікала праблемы ў кіроўцаў.
Цяпер ужо цяжка сказаць, хто ў Віцебску выказаў меркаваньне пра тое, што зьяўленьне на вуліцах прыгожых дзяўчат у міліцэйскай форме з паласатымі жэзламі ў руках будзе дысцыплінаваць удзельнікаў транспартнага руху. Кажуць нават, "кастынг" у службе ДАІ праводзіў асабіста начальнік абласнога міліцэйскага падраздзяленьня Леанід Фармагей. Так гэта альбо не, але ідэю пачалі ўвасабляць у жыцьцё каля месяца таму: каля дзесятка дзяўчат штовечар вывозілі на плошчу Свабоды, папярэдне адключыўшы сьветлафоры на гэтым самым буйным у Віцебску скрыжаваньні, каб патэнцыйныя рэгуліроўшчыцы змаглі патрэніравацца.
Кіроўцы адразу адзначылі, што ў часе трэніровак на цэнтральных вуліцах пачалі стварацца "пробкі". Бо арыентавацца ў насычаным транспартным патоку без адпаведнага досьведу рэгуліроўшчыцам было цяжка, і неспрактыкаваных дзяўчат тут жа на месцы кансультавалі абазнаныя рэгуліроўшчыкі-мужчыны. У неафіцыйных гутарках супрацоўніцы ДАІ адкрыта казалі, што баяцца выходзіць "на пост", каб самім не стварыць аварыйную сытуацыю. Тым больш падчас "Славянскага базару", калі ў цэнтры гораду транспартны рух непараўнальна больш інтэнсыўны...
Праводзячы паскоранае навучаньне рэгуліроўшчыц, ДАІ нечакана сутыкнулася зь яшчэ адной праблемай: як высьветлілася, далёка ня ўсе кіроўцы разумеюць "мову жэстаў", прызвычаіўшыся арыентавацца на сыгналы сьвятлафораў. Дарэчы, на плошчы Свободы ў Віцебску ўсталяваная самая сучасная сістэма сьветлавых сігналаў: пераходы аздобленая каляровымі таймерамі, што дазволіла істотна зьменшыць колькасьць ДТЗ у гэтым месцы. Цяпер кіроўцаў даводзіцца таксама "перавучваць" на стары ўзор. Паводле начальніка абласной управы ДАІ Сяргея Матаронка, кіроўцам ужо раздаюць адмысловыя памяткі-інструкцыі, дапоўненыя ілюстрацыямі – каб яны "пазнавалі" сыгналы рэгуліроўшчыц. "Дрэсіруюць" таксама й віцебскіх мінакоў: па некалькі гадзін на дзень адключаюць сьвятлафоры ў розных раёнах горада і давяраюць кіраваць рухам рэгуліроўшчыкам.
Сёньня ўжо ніхто не бярэцца сьцьвярджаць, што жаночая прыгажосьць уратуе калі не ўвесь сьвет, то хаця б Віцебск ад аварыйных сытуацый на дарогах. Незадаваленыя ідэяй супрацоўнікаў ДАІ і кіроўцы, і мінакі, і супрацоўнікі транспартных прадпрыемстваў, і арганізатары фэстывалю – усе прадчуваюць верагоднасьць прынамсі вялікіх праблем, калі ня значных аварый. І дзяўчаты-рэгуліроўшчыцы зусім не радыя аказанаму даверу – яны папросту баяцца браць на сябе адказнасьць падчас выкананьня сумнёўнай функцыі аздабляць сваёй прысутнасьцю фэстывальны Віцебск.
Алена Штраль
02.07.2008