Belnarod.org – Сайт региональных новостей от гражданских и профсоюзных активистов, журналистов и просто небезразличных людей

Адзін з мэтадаў дабраахвотнага лячэньня наркаманіі – патрапіць за краты. Юнак з Магілёву, які залежыў ад наркотыкаў, у судзе прасіў даць яму як мага большы тэрмін.

Жыцьцё 22-гадовага Ігара рэзка зьмянілася яшчэ ў 2007 годзе, калі ягоныя сябры прапанавалі паспрабаваць наркотыкі. Залежнасьць хутка пачала разьвівацца. Неўзабаве, у стане наркатычнага ап’яненьня, ён падпаліў суседзкі дом, і ў жніўні 2007 года быў асуджаны на пяць месяцаў так званай "хіміі". Паралельна праходзіў лячэньне ў Менскім наркалягічным дыспансэры. Аднак гэта яму не дапамагала. Залежнасьць ад наркотыкаў – рэч вельмі складаная. Па словах ўрачоў, шанцаў вылечыць залежнасьць ад ужываньня мэтадону амаль аніякіх.

Юнаку было вельмі цяжка. Ён неаднойчы зьвяртаўся да адміністрацыі ВУАТ-43, каб яго пасадзілі, бо вылечыцца, нават з мэдычнай дапамогай, гэтак і ня мог. Па матэрыялах справы, з 13 верасня мінулага году, асуджаны спэцыяльна парушаў рэжым абмежаваньня волі, каб патрапіць за краты.

У зале суду бяз слёзаў не абышлося – маці ўвесь час плакала і прасіла зьмягчыць пакараньне. Па яе словах, наркаманія – гэта хвароба, цяжар якой больш адбіваецца на маці. Аднак сын у апошнім слове прасіў прызначыць як мага большае пакараньне, каб болей не быць залежным ад наркотыкаў. У выніку яму далі тры гады...

Саша Заяц

28.05.2008

Ад пачатку году ў інтэрнатах Магілёўскага ўнівэрсітэта харчаваньня пажарнікі зачынілі ўсе пакоі для паленьня. Вынік – пажар. Бо студэнт мусіў паліць у прыбіральні.

Каля дванаццаці гадзін ночы ён вырашыў папаліць. Аднак пакоі для паленьня ва ўнівэрсытэцкіх інтэрнатах даўно зачыненыя пажарнымі службамі (да слова, бадай ужо ні ў адным інтэрнаце такіх пакояў няма). А на вуліцу пасьля адзінаццаці вечара выходзіць нельга. Вось і прыстасаваўся хлопец у прыбіральні. А непатушаны недапалак выкінуў у сьметніцу, якая потым загарэлася.

У выніку прыезду пажарных атрадаў эвакуіравалі ўсіх жыхароў, а гэта прыблізна 600 чалавек, і крыніца пажару была ліквідаваная. Студэнтам, якія жывуць з "падпальшчыкам" у блоку далі вымовы, маўляў, за тое, што адразу не засьведчылі, хто паліў, а сам учыньшчык пажару зь інтэрнату выселены.

Аднак шмат у каго пасьля гэтай гісторыі адказ на пытаньне: "Хто вінаваты?" – зусім іншы. Яны вінавацяць пажарнікаў і адміністрацыю студэнцкага гарадка. Бо калі недзе нешта зачыняеце. То мусіце прапанаваць альтэрнатыўныя варыянты. А гэтага не зрабілі. Ну а небарака-студэнті стаў "стрэлачнікам".

Саша Заяц

27.05.2008

Магілёвец сарваў дзяржсьцяг у міліцыі і – дадому. Выпадак патрыятызму, ці крымінальнае злачынства? Вырак суду: "Зьнявага дзяржаўнай сымболікі".

Кур’ёзны выпадак адбыўся ў Кастрычніцкім РАУСе Магілёву. Спачатку грамадзяніна затрымалі за дробнае хуліганства. А пасьля таго, як яго адпусьцілі, знаходзячыся ў нецьвярозым стане, за сваю свабоду вырашыў "адзьдзячыць" міліцыянтаў – сарваў дзяржаўны сьцяг, што вісеў над Дошкай гонару, і панёс дадому. У выніку ізноў быў затрыманы і падпаў пад артыкул Крымінальнага кодэксу.

Кастрычніцкі суд спачатку разглядваў гэтае злачынства пааводле артыкулу 339 ч.1 "Парушэньне парадку ў грамадзкім месьце", аданак у выніку быў прызначаны штраф у памеры 30 базавых велічынь згодна з артыкулам 370 Крымінальнага кодэксу "Зьнявага дзяржаўнай сымболікі".

Саша Заяц

26.05.2008

БРСМ прапанаваў увесьці адміністрацыйную адказнасьць за ўжываньне піва ў грамадзкіх месцах. Захапленьня такая прапанова не выклікае нават у шараговых чальцоў арганізацыі.

На трэцяй магілёўскай канфэрэнцыі ГА "БРСМ", у прысутнай моладзі была магчымасьць задаць пытаньні старшыні гарвыканкаму Віктару Шорыкаву. Усе былі загадзя падрыхтаваныя, вычытаныя, завучаныя і ўзгодненыя. А ніхто незаплянаваны да мікрафону не падыходзіў.

Галоўны спэцыяліст гарадзкога камітэту БРСМ Аляксандр Шлык у сваім выступленьні, якое тычылася моладзевых дабраахвотных дружынаў, унёс прапанову да мэра: уключыць піва ў шэраг сьпіртовых напояў, а не алькагольных. Такім чынам, чалавека, які будзе ўжываць піва ў грамадзкіх месцах, можна будзе ня толькі папярэджваць, а прыцягнуць да адміністрацыйнай адказнасьці.

Мэр анічога не адказаў і ніяк не прарэагаваў. А заля, у якой прысутнічала амаль толькі моладзь, зашумела.

– Вось з-за такіх потым уся моладзь і пакутуе. І ўсё гэта з-за прымусу. Трэба было штосьці прапанаваць, а калі аніякіх праблемаў БРСМ ня мае, дык давайце прапануем гэта. Штосьці ж трэба прапаноўваць... Я думаю, спадар Шлык сам неаднойчы, седзячы дзе-небудзь на лаўцы, выпіў піва бутэльку-другую, – узрушаецца дэлегат канфэрэнцыі.

А што яшчэ можна было прапанаваць, як не забарону? Вядома, пралукашэнкаўскі камсамол жыве савецкімі часамі, "сухімі законамі", прымусамі і абмежаваньнямі.

Саша Заяц

19.05.2008

У Магілёве зьявіцца яшчэ адзін хакейны палац. Пра гэта паведаміў старшыня гарвыканкаму Віктар Шорыкаў.

На канферэнцыі БРСМ у сваім пытаньні мэру прадстаўнік моладзі адзначыла, што ў Кастрычніцкім раёне гораду не хапае спартыўных пляцовак, а езьдзіць па горадзе, каб займацца спортам, дорага, тым больш адмененыя льготы.

У адказ на гэта спадар Шорыкаў пералічыў усе спартыўныя пляцоўкі, і адзначыў, што ў плянах – пабудаваць яшчэ адзін лядовы палац. Маўляў, лёду не хапае на ўсіх жадаючых. Грошы на палац знайшлі ў гарадзкім бюджэце.

Саша Заяц

16.05.2008

У сярэдзіне працоўнага дня, больш за 70 жыхароў выйшла пратэставаць супраць будаўніцтва АЗС па вуліцы Сіманава. Некаторыя прыходзілі проста з працы. Гучалі заклікі нават зруйнаваць будаўніцтва сваіма сіламі.

Напярэдадні па району былі разклееныя абвесткі, з анонсам сустрэчы. Цэнтральнай падзеяй сустрэчы быў прыезд дзяржаўнага тэлебачаньня.

Нагадаем, што пачынаючы з 23 красавіка папросту пад вокнамі будынку па вуліцы Сіманава № 69 пачаліся будаўнічыя работы. Замоўнікам будаўніцтва ёсьць РУП "Белнафтахім", "Белоруснефть". Выканаўцам – ТАА "Трансстрой".

Сход адбыўся ля будынку № 69. Падчас акцыі грамадзяне зьбіралі подпісы пад заявай ў раённую пракуратуру й пад грамадзкім дакумантам, які мае вызначыць іхную думку наконт будаўніцтва АЗС, паводле дзеючага заканадаўства.

Грамадзяне выказалі сваю думку дзаржаўнаму тэлебачаньню без залішніх комплексаў: гучаліў нават заклікі ўзарваць АЗС. Але галоўнымі аргуманамі было тое, што проста не сумленна будаваць гэтакій аб’ект у 15 мэтрах ад жытловага будынку. Дарэчы, гэты катэгарычна забаронена інструкцыямі МНС і Міністэрства аховы навакольнага асяродзьдзя.

Сустрэча праходзіла пры непасрэднай падтрымцы Творчай групы "Наш Магілёў".  Адзін з каардынатараў ТГ "Наш Магілёў" заклікаў жыхароў да канструктыўнай барацьбы за свае законныя інтарэсы:

– Варта рыхтавацца да шматмесячнай перапіскі: раённая пракуратура хутчэй за всё адмовіць, на абласную – надзеі таксама мала, але Гэнеральная пракуратура абавязкова звярне ўвагу на галавацяпства мясцовага чынавенства. Мова тут ідзе не пра хабары Шорыкаву й Батуры, але пра тое, што яны нават не падумалі калі пад вокны Вам уціснулі гэтую заправку. Пры гэтым, праз гэтае будаўніцтва, прыйдзецца пераносіць дарогу, што вядзе на Грэбянёва, а гэтае па-просту ёсьць злачынным выкарыстаньнем бюджэтных сродках у інтарэсах асобных прадпрыемстваў.

Юры Ермаловіч, выканаўца працы з боку ТАА "Трансстрой" да грамадзянаў не выйшаў, але нашаму карэспандэнту распавёў, што такую самую АЗС ён будаваў на мікрараёне "Ювілейны":

– Я гарантую, што аб’ект будзе бясьпечным, - пры гэтым Ермаловіч адмовіўся каментаваць дазвол гарвыканкаму на будаўніцтва, але даў зразумець, што небясьпекі для жыхароў не бачыць.

Жыхары засталіся настроенымі рашучы, пры гэтым пяцёра дэлегатаў у гэтый жа дзень накіраваліся на прыём да старшыні гарвыканкаму Шорыкава. Жыхары мяркуюць, што барацьба ня можа прынесьці імгненных вынікаў, але пагадзіліся "ісьці да канца":

– Хоць кожны дзень будзем зьбіраць подпісы, прыцягнем да наше праблемы ўвесь раён, а калі спатрэбіцца – і увесь Магілёў, - гэтак адняслася да праблемы Ірына, жыхарка будынку № 69, настаўніца школкі № 5.

Тым часам, Юры Ермаловіч паведаміў, што пры будаўніцтве АЗС на "Ювілейным" у іх былі праблемы з фізычным разбурэньнем жыхарамі будаўніцтва. Ён запэўніў, што на пляцоўцы па вуліцы Сіманава працуе кваліфікаваны вартаўнік.

Андрэй Воўкаў

15.05.2008

Новы мэтад абараніць падсуднага – нецэнзурная лаянка. Цярплівасьць магілёўскіх судзьдзяў проста ўражвае!

Пачуць адборныя "пэрлы" давялося ў зале Кастрычніцкага суду Магілёва. Разглядалася там наступная справа.

16 лютага ў нецьвярозым стане абвінавачваемы 1981 году нараджэньня каля крамы "Алімп" зьбіў жыхара з бульвара Няскораных. Вярнуўшыся дахаты, пацярпелы міліцыю выклікаць ня стаў. Раззлаваны сын пацярпелага са сваімі сябрамі вырашыў выйсьці да крамы і знайсьці сьведак. Замест іх натрапілі на самога злачынцу, які набываў сабе "дагонку". Пасьля непрацяглай спрэчкі пацярпелі ўжо сын і ягоныя 15-гадовыя сябры.

Суд цягнуўся чатыры з паловай гадзіны безь перапынку. Аднак падсудны (ён ужо тройчы пабыў у турме) сваёй віны не прызнаў. Паседжаньне вырашана адкласьці на 26 траўня.

Яшчэ больш зьдзівіла маці падсуднага. Яна расказала, што сын пастаянна патрабуе набываць алькаголь і цыгарэты. Маўляў, ты абавязаная і кропка!

Здавалася б, пашкадаваць трэба матулю. Аднак… Лексіка ды паводзіны ня вельмі адрозьніваліся ад паводзінаў сына.

Зь месца ў залі пастаянна абражала сьведкаў і пацярпелых брыдкаслоўем. Ёй было ўсё адно, дзе яна знаходзіцца. Не спыніла жанчыну і тое, што судзьдзя ня раз пагражала штрафам. Зразумела, што і сын вырас такім...

Усё часьцей у апошні час хлопцам ад 18 да 22 гадоў выносяць прысуд па 107 артыкуле Адміністратыўнага кодэксу: прымусовае лячэньне ад алькагалізму.

Саша Заяц

14.05.2008

Больш за 250 подпісаў сабралі жыхары дамоў, побач зь якімі будуюць аўтазапраўку. Ужо пададзена больш за тры звароты да ўладаў і структураў.

Адказаў пакуль не было. Аднак жыхары працягваюць выказвацца "супраць".

З пачатку траўня ў 10 мэтрах ад дамоў №65 і 69 па магілёўскай вуліцы Сіманава будуюць аўтазапраўку, аднак побач разьмяшчаецца дастаткова вольнае поле. Заказчыкам будаўніцтва зьяўляецца "Магілёўнафтапрадукт".

Узрушаныя жыхары на месцы сядзець не сталі. Звароты з копіямі сабраных подпісаў накіравалі ў Упраўленьне архітэктуры гарвыканкаму і экалягічную міліцыю. У шэрагу памагатых аказаліся і дзяржаўныя СМІ. Лісты са зваротам накіравалі на дзяржаўнае тэлебачаньне і ў рэспубліканскія газэты. У бліжэйшыя дні скарга будзе пададзена ў пракуратуру Кастрычніцкага раёну. Акрамя таго, прадстаўнікі грамадзян, што падпісаліся пад зваротам, пойдуць на прыём да старшыні гарвыканкама Віктара Шорыкава.

– На мой погляд, гэтыя паходы да Шорыкава ні да чаго не прывядуць, – адзначае Андрусь Воўкаў, каардынатар  Творчай группы "Наш Магілёў", якая дапамагае жыхарам змагацца за свой дабрабыт. – Паход на прыём проста бескарысны. Неразумна хадзіць да таго чалавека, з санкцыі якога, мабыць, і распачата будоўля. Праблему можа вырашыць толькі абласная ці рэспубліканская пракуратура, а надзейней за ўсё – адміністрацыя прэзыдэнта. На раённым і гарадзкім узроўні ўсё "схоплена".

– Гэтая будоўля парушае шмат законаў. І парушэньні апісаныя ў нашай скарзе. Таму галоўнае спадзяваньне на адпаведныя дзеяньні пракуратуры. Мы верым, што свайго даб’емся. Тым больш, ад боку нашага дому да будоўлі крыху болей за 10 мэтраў, – адзначаюць жыхары 69-га дому.

Між тым, на месцы заплянаванай будоўлі трактар ужо зачысьціў паверхню глебы.

Саша Заяц

13.05.2008

У Магілёве падчас афіцыйнага дзяржаўнага мітынга прысвечанага Дню працы быў затрыманы рабочы-будаўнік, сябра БСДП (Грамады) Мікола Расюк.

– Я дамовіўся сустрэцца са сваім працоўным калектывам каля "Дом Быта", але быў затрыманы на падыходзе да яго, – распавядае Мікола Расюк. Адзін з міліцыянераў сказаў, што я падазраюся ў нейкім злачынстве і што для разбіральніцтва мне неабходна прайсці ў Ленінскі РАЎС. Пасля таго, як я зразумеў, што маім планам, прайсціся са сцягам Беларускай Сацыял-дэмакратычнай партыі разам з мітынгуючымі не ўдасца здзяйсніцца, я дастаў сцяг і абматаў яго вакол сябе. На дзіва, міліцыянты не мелі нічога супраць.

У Ленінскім РАЎСе Міколу Расюка пратрымалі крыху больш чым за дзве гадзіны. Міліцыянты запытвалі яго, ці быў ён некалькі дзён назад у Пінску, дзе адбылося злачынства, якое здзейсніў чалавек, які знешне вельмі падобны на Міколу Расюка. На гэта Мікола патлумачыў, што ў гэты час знаходзіўся ў Магілёве.

– У мяне было каля двух дзесяткаў асобнікаў газеты "НАШ Магілёў", якія мне вярнулі пасля дагляду рэчаў. Некалькі асобнікаў узялі быццам бы для азнаямлення. Партыйны сцяг таксама не забіралі. Я таксама распавёў супрацоўнікам міліцыі пра тое, што такое дэмакратыя і якія павінны быць узаемаадносіны на працы паміж начальнікам і падначаленым. Яны слухалі і згаджаліся, – гаворыць рабочы-будаўнік.

Пасля таго як мітынг скончыўся, Міколу Расюка адпусцілі.

Вітольд Няўрыда

01.05.2008